طويق الشاعر الامير خالد بن سعود

ياصاحبي روّح ترى البال عكني
عكنني اللي يمضع العلك ويلوك
غروٍ يظن إنه بزينه شبكني
وطويق راسي ماإحترك منه محكوك
راح يتثيقل يحسب انه دهكني
مايدري ان الثقل عندي له صكوك
أجز حبله لوه بالحيل مكني
وانزع كما حرٍ من الكف مفكوك
وادعك فواده مثل ماهو دعكني
حتى يصير التارك اليوم متروك
يابنت ما احدٍ في حياتي ملكني
انا سليل ملوك مانيب مملوك
ما احدٍ ملكني غير رب سبكني
اللي تحت ملكه مماليك وملوك
فضله ومعروفه وخيره مسكني
له الثنا والحمد آلاف والكوك
ماغاب عن بالي ولا قد تركني
الخوف منه ورحمته مابها شكوك
عالم جميع العلم ظاهر ومكني
يعلم خبايا الصدر والصدر مصكوك
والحب لو هو ياملا يحتنكني
حبٍ يذل الرجل ماهوب مبروك