يابنت ماني فيك مغـرم وهيمـان

من طرف لقيت روحي الخميس فبراير 14, 2008 12:55 pm

يابنت ماني فيك مغـرم وهيمـان
ولا نيب عاشق أو من أهل الأمانـي
أنا مجرد شخص عايـش بحرمـان
وماظنتـي مثلـي أبـد مودمانـي
من شوفتي لك صرت يابنت حيران
وعادت بي الذكرى لهـاك الزمانـي
وذكرت منهو شب في القلب نيران
هاك الغـزال اللـي بحبـه بلانـي
وسريت في ليل الهوى دون عنـوان
أحلى سنين العمـر بأربـع ثوانـي
حتى سمعت منادي قـال غلطـان
وفتحت عيني وأثر حبـي عمانـي
من شان ذا يابنت بعطيك برهـان
مثبـت بأجمـل وصـوف المعانـي
أنتي سكنتي قصر صمـم بإتقـان
وأنا سكنت الطيـن قبـل المبانـي
وأنتـي تمشيتـي بلنـدن ولبنـان
وأنـا بريضـان رغبـه ذا مكانـي
وأنتي ركبتي الروز والبنـز والفـان
وأنا معـي موتـر يزيـد إمتحانـي
وأنتي طربك إليا صدح صوت فنان
وأنا أنطرب لأوحيت صوت السواني
أكبر همومك لون جزمه وفستـان
وأصغر همومـي كسـرن المحانـي
أنتي حياتك كلها أشكال وألـوان
وأنا حياتي شكل مـن دون ثانـي
على كذا يابنت وش صار وش كان
صدفه وربي فـي طريقـك رمانـي
وختامها نطلـب مـن الله غفـران
وإنـه يسكنـا بعالـي الجنـانـي
وصلاة ربي عـد همـال الامـزان
على شفيع الخلق قاصـي ودانـي
الشاعر
راشد الهويمل